Baky Tylla - bilim merkezi bilen söhbetdeşlik.

Bu söhbetdeşlikde merkeziň döreýşi, iş ýörelgesi, gazanan üstünlikleri we geljek meýilnamalary barada giňişleýin gürrüňdeş bolduk.

1. Baky Tylla - bilim merkezi haçan we nähili maksat bilen esaslandyryldy? Baky Tylla adynyň aňladýan manysy näme?

Baky Tylla - bilim merkezi mundan bir ýyl ozal öňki halkara olimpiada ýeňijileri bolan Köçekow doganlar — Kemal we Kerim Köçekowlar tarapyndan esaslandyryldy. Bu merkez mekdep okuwçylaryny informatika olimpiadalaryna taýýarlamak we geljegiň hünäri bolan IT ugry boýunça başarnyklary ösdürmek maksady bilen açyldy. Eýýäm merkezimiz okuwyň 5-nji tapgyryny dowam etdirýär. Baky Tylla ady - baky we tylla sözlerinden ybarat bolup, biziň berýän bilimimiziň (tyllamyzyň) ömürlik (baky) galmagyny aňladýar.

2. Häzirki wagtda merkezde haýsy ugurlar boýunça dersler okadylýar?

Häzirki wagtda merkezimizde esasan informatika we matematika ugurlary boýunça çuňlaşdyrylan sapaklar berilýär. Şeýle hem, bilim merkezimiz iňlis dili sapaklaryny bermegi meýilleşdirýär. Sebäbi merkeziň esaslandyryjylary geljekde ähli ugurlarda iňlis dili we informatika biliminiň zerur boljakdygyna ynanýarlar.

3. Siziň merkeziňizi beýleki bilim merkezlerinden tapawutlandyrýan esasy aýratynlyk näme? Haýsy döwrebap tehnologiýalary we usulyýetleri ulanýarsyňyz?

Esaslandyryjylarymyzyň we mugallymlarymyzyň köpüsiniň öňki olimpiada ýeňijileri bolmagy bizi beýleki merkezlerden tapawutlandyrýan esasy aýratynlykdyr. Sapaklarymyz uniwersitet derejesinde bolup, dünýä standartlaryna laýyk gelýän meýilnamalar esasynda okadylýar. Döwlet we halkara olimpiadalarynyň ýeňijileriniň uly göteriminiň biziň merkezimizden bolmagy tötänlik däldir. Programmirleme dili hökmünde C++ öwredýäris, sebäbi bu dil halkara olimpiadalarynda mesele çözmek üçin iň çalt we rugsat berilýän ýeke-täk dildir.

4. Mugallymlaryňyzyň tejribesi we hünär derejesi barada nämeleri aýdyp bilersiňiz? Olary işe kabul edeniňizde nämelere üns berýärsiňiz?

Mugallymlarymyzyň köpüsi uzak wagtdan bäri halkara olimpiadalary bilen gyzyklanyp gelýändikleri sebäpli, olaryň tejribesi heniz okuwçy wagtlaryndan başlaýar. Olaryň hemmesi ýokary okuw jaýlaryny tamamlap, ýurdumyzyň belli uniwersitetlerinde we kompaniýalarynda jogapkärli wezipelerde işleýärler. Işe kabul edenimizde esasy olaryň iş tejribesine we hünär derejesine üns berýäris. Muny subut etmek üçin dalaşgärlerden amaly ýagdaýda "demo sapak" bermegini talap edýäris.

5. Okuwlara haýsy ýaşdaky adamlar gatnaşyp bilýärler? Çagalar we ulular üçin aýratyn maksatnamalaryňyz barmy?

Biz esasan 12 ýaşdan uly bolan diňleýjileri kabul edýäris. Şol sebäpli okuw maksatnamalarymyz esasan orta we uly ýaşly okuwçylar üçin niýetlenendir.

6. Kursy tamamlan diňleýjilere berilýän resminamalar (sertifikatlar) döwlet ýa-da halkara derejesinde nähili ähmiýete eýe?

Gysga wagtyň içinde IT pudagyndaky edara-kärhanalaryň köpüsi biziň merkezimiziň okuw derejesinden habardar boldy. Şonuň üçin hem kompaniýalar işe kabul edende ýa-da olimpiadalara saýlaw geçirilende biziň beren sertifikatlarymyza uly ynam bildirýärler.

7. Merkeziňizde bilim alan okuwçylaryň gazanan uly üstünliklerinden (olimpiada ýeňişleri, daşary ýurtda okuwa girmek we ş.m.) mysal getirip bilersiňizmi?

Hawa, diňe 2025-nji ýylda halkara olimpiadalarynda gazanan üstünliklerimiz şeýle:

- Rumyniýa (Info(1)Cup): 2 bürünç medal.

- Bolgariýa (IATI): 3 bürünç medal.

- Gazagystan (Žautykow): 3 bürünç medal.

- Özbegistan (Al-Horezmi): 1 kümüş we 1 bürünç medal.

- Täjigistan (KhMIO): 1 kümüş we 1 bürünç medal.

Şeýle hem, biz talyplaryň daşary ýurtlaryň abraýly ýokary okuw jaýlaryna girmegine ýakyndan ýardam berýäris. Bu ugurda uly tejribämiz bar bolup, okuwa kabul edilmek we beýleki resminamalar barada giňişleýin maglumat almak üçin bize ýüz tutup bilersiňiz.

8. Ýakyn wagtda täze ugurlary açmak ýa-da merkezi giňeltmek barada nähili meýilnamalaryňyz bar?

Geçen ýylyň ortasynda geçiren 3 aýlyk Backend Development bootcamp-y örän netijeli boldy. Bu taslamany Yandex we Huawei ýaly dünýä belli kompaniýalarda iş tejribesi bolan Kemal Köçekow alyp bardy. Bu okuwy indiki tapgyrda 6 aýlyk möhlet bilen gaýtalamagy, şeýle hem Frontend, UI/UX we Mobile App Development ugurlaryny açmagy meýilleşdirýäris.

9. Okuw tölegleri barada maglumat berip bilersiňizmi?

3 aýlyk informatika we matematika kurslarymyzyň tölegi 1600-2000 manat aralygynda üýtgeýär. Giňişleýin maglumat üçin telefon ýa-da elektron poçta arkaly habarlaşyp bilersiňiz.

10. Täze okuwçylar sizi nähili tapyp bilerler?

Salgy: Aşgabat şäheri, A. Nyýazow şaýoly, Telekeçiler birleşmesi, 2-202.

Telefon: +993 64 445894

Sosial ulgamlar (Instagram, TikTok): @baky_tylla